प्रदेश १ को स्थगित भएको प्रदेशसभा बैठक माघ २५ गते बस्ने

विराटनगर /अनिश्चित कालको लागि स्थगित भएको प्रदेश नम्बर १ को प्रदेशसभा बैठक यही माघ २५ गते बस्ने भएको छ । प्रदेशसभा सचिबालयले आइतबार सूचना जारी गर्दै २५ गते २ बजे बैठक बस्ने जानकारी गराएको छ ।

नेकपाको फुटसँगै प्रदेश १ सरकारका मुख्यमन्त्री शेरधन राईविरुद्ध अविश्वास प्रस्ताव दर्तापछि मुख्यमन्त्री राईलाई नेकपाका बहुमत सांसदले दलको नेताबाट हटाएको र मुख्यमन्त्रीले अविश्वास प्रस्ताव दर्ता गर्ने १६ जना सांसदलाई निलम्बन गरेको अवस्थामा आह्वान गरिएको प्रदेश सभामा प्रदेश प्रमुखको पत्र सभामुखले पढेर सुनाएपछि बैठक स्थगित भएको थियो ।

अविश्वास प्रस्ताव दर्ता भएको अवस्थामा प्रदेशसभाको बैठक लामो समय स्थगित भएको भन्दै प्रस्ताव दर्ता गर्ने सांसदहरुले तत्काल बैठक सुरु गर्न माग गरेका थिए ।

प्रदेशसभाको अबको बैठकमा मुख्यमन्त्री राईविरुद्ध दर्ता भएको अविश्वास प्रस्ताव अगाडि बढ्ने बताइएको छ । आफूले निलम्बन गरेको सांसदलाई प्रदेशसभामा प्रवेश नदिइने र सभामुखले प्रवेश गराएमा बैठक अबरुद्ध गर्ने नेकपा संसदीय दलका प्रमुख सचेत बुद्धिकुमार राजभण्डारीले बताएका छन् ।

राजभण्डारीलाई नेकपाको संसदीय दलको बहुमत पक्षले प्रमुख सचेतबाट हटाइसकेको छ भने मुख्यमन्त्री राईलाई दलको नेताबाट हटाएर भीम आचार्यलाई नेता चुनेको छ । बहुमत पक्षले पनि मुख्यमन्त्रीसहित ८ सांसदलाई निलम्बन गरेको छ ।

प्रदेशसभामा सरकारले कुनैपनि बिद्येयक दर्ता नगरेकोले आगामी बस्ने बैठकको लागि अविश्वास प्रस्ताव बाहेक अरु कुनै कार्यसूची नभएकाले बैठक कसरी अगाडि बढ्छ भन्ने जिज्ञासा र चासोको विषय बनेको छ ।